Greiðsluþátttökukerfi - hvað þarf að borga fyrir heilbrigðisþjónustu?

Greiðsluþátttökukerfi Sjúkratrygginga sér til þess að einstaklingar greiða ekki meira en ákveðna hámarksfjárhæð í hverjum mánuði fyrir heilbrigðisþjónustu.

Einstaklingar geta skoðað greiðslustöðu sína undir Heilsa á Mínum síðum.

Greiðslur

Hámarksgreiðsla

• Almennt gjald frá: 34.950 krónur

• Aldraðir, öryrkjar og einstaklingar sem fá endurhæfingalífeyri frá Tryggingastofnun: 23.301 krónur

• Börn 2-18 ára: 23.301 krónur

• Börn yngri en 2ja ára: ekkert gjald

Börn innan sömu fjölskyldu teljast sem eitt barn í greiðsluþátttökukerfinu.

Börn yngri en 18 ára fá þjónustuna gjaldfrjálst ef þau eru með tilvísun. Annars er greitt 30% af gjaldskrá sem telur inn í greiðsluþátttökukerfið. Nánar um tilvísanir vegna þjónustu.

Mánaðarleg greiðsla eftir að hámarksgreiðslu er náð

• Almennt gjald: 5.825 krónur

• Aldraðir, öryrkjar og einstaklingar sem fá endurhæfingalífeyri frá Tryggingastofnun: 3.884 krónur

• Börn yngri en 18 ára: 3.884 krónur

Ef þú nýtir ekki heilbrigðisþjónustu næstu mánuði þá safnast mánaðarlega gjaldið upp og bætist við næstu greiðslu. Sjá dæmi um útreikning á greiðslu.

Ofgreiðslur og endurgreiðslur

Upplýsingar um greiðslur einstaklinga hjá heilbrigðisþjónustuveitendum berast alla jafna til Sjúkratrygginga daglega. Ef stutt er á milli komu til heilbrigðisþjónustuveitanda eða fleiri en ein koma er sama daginn getur komið upp að þú greiðir of mikið, þar sem greiðslustaða þín hefur ekki verið uppfærð.

Greiðsluþátttökukerfið heldur utan um ofgreiðslur og endurreiknar stöðu einstaklings. Endurgreiðsla er lögð inn á bankareikning þinn og tilkynning berst í tölvupósti. Mikilvægt er að vera með rétt skráðar bankaupplýsingar svo hægt sé að endurgreiða.

Ef reikning vantar á Mínar síður skaltu hafa samband við heilbrigðisþjónustuveitanda þar sem reikningur hefur þá ekki skilað sér til Sjúkratrygginga.